ដោយ :បន្ទាយ

បន្ទាយមានជ័យ ៖ ក្រុមហ៊ុនចំនួន២ គឺក្រុមហ៊ុន អេឌី អាក អ៊ិនដាសស្ទៀល ផាក ឯ.ក និងក្រុមហ៊ុន ខេមរិន (ខេមបូឌា) ឌីវេឡុបម៉ិន បានចុះអនុស្សរណៈយោគយល់គ្នា( MOU)  ដើម្បីបង្កើតកិច្ចសហការជាក្រុមហ៊ុនបណ្តាក់ទុនរួមគ្នា និងរវាងភាគីពាក់ព័ន្ធ។ ការចុះ(MOU) ធ្វើឡើងនៅសាលប្រជុំ ខ សាលាខេត្តបន្ទាយមានជ័យ ។នេះបើតាមមន្ត្រីបានឲ្យដឹងកាលពីថ្ងៃទី១០ខែធ្នូ ឆ្នាំ ២០២៤។

លោកសេង ស៊ីណារិន  អ្នកសម្របសម្រួលគម្រោងខាងលើបានបញ្ជាក់ពី គោលដៅចម្បង នៃការចុះអនុស្សរណៈយោគយល់គ្នា (MOU) គឺរួមមានការអភិវឌ្ឍន៍សួនថាមពលកកើតឡើងវិញ ទីធ្លាបៃតង និងតំបន់ឧស្សាហកម្មដែលមិនប៉ះពាល់ដល់បរិស្ថាន ជាពិសេសនៅក្នុងទីក្រុងឧស្សាហកម្ម បៃតងតេជោភ្នំឆត្រ។

គម្រោងនេះមានគោលបំណងលើកកម្ពស់ការឆ្លងកាត់ព្រំដែន និងកែលម្អសកម្មភាព សេដ្ឋកិច្ច និងទំនាក់ទំនងពាណិជ្ជកម្មរវាងកម្ពុជា ចិន និងថៃ ដែលជាការជំរុញសមាហរណកម្មសេដ្ឋកិច្ចក្នុងតំបន់។

ការបណ្តាក់ទុនរួមគ្នានេះ ក៏នឹងបែងចែកធនធានហិរញ្ញវត្ថុ បច្ចេកវិទ្យា និងជំនាញវិស្វកម្មឧស្សាហកម្ម ដើម្បីបង្កើតផែនការមេដ៏ទូលំទូលាយសម្រាប់សួនថាមពលកកើតឡើងវិញ និងការអភិវឌ្ឍន៍ឧស្សាហកម្ម ដោយធានាបាននូវបរិស្ថានទីក្រុង និងផែនការឧស្សាហកម្មដែលមានរចនាសម្ព័ន្ធល្អ ស្របតាមគោលការណ៍ និរន្តរភាព និងគោលដៅអភិវឌ្ឍប្រកបដោយចីរភាព (SDGs)។

មួយវិញទៀត កិច្ចសហប្រតិបត្តិការគ្នារវាងក្រមហ៊ុនទាំងពីរ ផ្តោតលើការអភិវឌ្ឍន៍ឧទ្យានថាមពលបៃតងស្អាត និងទីក្រុងឧស្សាហកម្មបៃតងតេជោភ្នំឆត្រ ដែលមានទីតាំងនៅភូមិភ្នំឆត្រ ឃុំស្វាយចេក ស្រុកស្វាយចេក ខេត្តបន្ទាយមានជ័យ។

ក្នុងឱកាសនោះលោក  អ៊ុំ រាត្រី អភិបាលខេត្តបន្ទាយមានជ័យ ក៏បានថ្លែងនូវការសាទរ និងគាំទ្រយ៉ាងពេញទំហឹង ចំពោះក្រុមហ៊ុនទាំងពីរត្រូវបានចាប់ដៃគូគ្នាក្នុងការអភិវឌ្ឍន៍ឧទ្យានថាមពលបៃតងស្អាត និងទីក្រុងឧស្សាហកម្មបៃតងតេជោភ្នំឆត្រ ដើម្បីបង្កើនឱកាសការងារដល់ប្រជាពលរដ្ឋនៅក្នុងមូលដ្ឋានមានការងារធ្វើ ហើយជួយរួមចំណែកកាត់បន្ថយការចំណាកស្រុក។ជាពិសេសជួយដល់កសិករដែលកំពុងតែដាំដំឡូងមី មានទីផ្សារក្នុងការផលិតនិងកែច្នៃនៅក្នុងស្រុក។

សូមបញ្ជាក់ថា គ្រោងការនេះមានគោលបំណងបង្កើតទីក្រុងឧស្សាហកម្មបៃតងទំនើប។ ធាតុសំខាន់ៗនៃទីក្រុងឧស្សាហកម្មនេះរួមមាន ៖ រោងចក្រថាមពលបៃតង: ផ្តោតលើការប្រើប្រាស់ប្រភពថាមពលដែលមានស្រាប់ពីធម្មជាតិដូចជា ប្រភពថាមពលពីពន្លឺព្រះអាទិត្យ ខ្យល់ និងប្រព័ន្ធផ្ទុកថាមពលថ្ម (BESS) ដើម្បីបង្កើតប្រព័ន្ធអេកូ ថាមពលដ៏រឹងមាំ, សំណង់ឧស្សាហកម្ម បង្កើត និងពង្រីករោងចក្រផលិត និងតំបន់ឧស្សាហកម្ម ដើម្បីទាក់ទាញការវិនិយោគ បង្កើតឱកាសការងារ និងជំរុញខ្សែចង្វាក់ផលិតទំនិញ និងសេវាកម្ម, តំបន់ស្នាក់នៅ ផែនការស្នាក់នៅ និងតំបន់រស់នៅដែលមានការគិតគូរល្អ ដើម្បីផ្តល់ការស្នាក់នៅដែលមានផាសុកភាព និងងាយស្រួលសម្រាប់កម្មករ និងប្រជាជនក្នុងទីក្រុង, ហេដ្ឋារចនាសម្ព័ន្ធគាំទ្រ និងសេវាកម្មរដ្ឋបាល ស្ថាបនាហេដ្ឋារចនាសម្ព័ន្ធចាំបាច់មួយចំនួនរួមមាន ផ្លូវថ្នល់ សេវាកម្មសាធារណៈ និងសេវាកម្មរដ្ឋបាល ដើម្បីធានាការគ្រប់គ្រងទីក្រុងមានប្រសិទ្ធភាព។

សូមបញ្ជាក់ថា : អនុស្សរណៈយោគយល់គ្នានេះ មានសុពលភាពក្នុងរយៈពេលដំបូងចំនួនប្រាំ (០៥) ឆ្នាំ ដោយចាប់ពីថ្ងៃទី០៩ខែធ្នូ ឆ្នាំ២០២៤ ៕